គេហទំព័រសារព័ត៌មាន ខ្មែរស៊ីអូ : តោះ ទៅលេងវត្តតុំ!

You Are Here: Home» កម្ពុជាអច្ឆរិយៈ , ដំណើរកម្សាន្ដ » តោះ ទៅលេងវត្តតុំ!

តោះ ទៅលេងវត្តតុំ!

Posted by Cambodia Morning on Tuesday, July 30, 2013 | 0 comments

“ឱ ដូនកែវកុំឡើយលាក់ខ្ញុំ ដូនកែវវត្តតុំ បងនឹកម៉ុមណាស់”។ នេះជាឃ្លាខ្លីមួយក្នុងបទចម្រៀងមនោសញ្ចេតនាដ៏ពីរោះរណ្ដំ ដែលមានចំណងជើងថា “ដូនកែវដួងចិត្ត” របស់លោក ណូយ វណ្ណេត។ បទនេះបានបរិយាយពីរឿងរ៉ាវស្នេហាថ្មោងថ្មីរវាងកំលោះទីក្រុង ម្នាក់ និងក្រមុំជនបទ ដែលមានលំនៅដ្ឋានក្បែរវត្តតុំ ស្ថិតក្នុងទឹកដីខេត្តតាកែវ នៅគ្រាដែលលោកបានទៅលេងវត្តតុំនោះ ក្នុងថ្ងៃបុណ្យបញ្ចុះខណ្ឌសីមាឆ្លងព្រះវិហារថ្មី រយៈពេល៣យប់៤ថ្ងៃ។

បុណ្យបញ្ចុះខណ្ឌសីមារយៈពេល៣យប់៤ថ្ងៃ បានធ្វើឲ្យកំលោះក្រុង និងនារីជនបទសាងទំនាក់ទំនងស្នេហានឹងគ្នា។ សេចក្តីស្នេហ៍បានដក់ដាមយ៉ាងជ្រៅក្នុងបេះដូងកំលោះទីក្រុង រហូតដល់ដេកព្រួយច្រៀងផ្ដាំបុប្ផាជនបទ កុំឲ្យបែកបែរចោលខ្លួនឲ្យសោះ។

ដោយសារអត្ថន័យនៃបទចម្រៀងដ៏លន្លង់លន្លោចនេះហើយ បានធ្វើវត្តតុំ ដែលស្ថិតនៅជនបទសោះ បែរជាមានឈ្មោះបោះសំឡេងនឹងគេដែរ។ មនុស្សម្នាមួយចំនួនបានទៅលេងវត្តនេះ។ វត្តតុំ ស្ថិតនៅស្រុកដូនកែវ ខេត្តតាកែវ មានចម្ងាយប្រមាណជិត៨០គីឡូម៉ែត្រ ពីរាជធានីភ្នំពេញ។ បើគេចាកចេញពីរួមខេត្តតាកែវ តាមផ្លូវជាតិលេខ២ ឆ្ពោះទៅស្រុកគីរីវង់ ព្រំដែនកម្ពុជា-វៀតណាម ប្រមាណជា៤គីឡូម៉ែត្រ គេនឹងឃើញខ្លោងទ្វារវត្តពណ៌មាសលម្អដោយរចនាបថខ្មែរមួយឈរ ច្រងាងនៅខាងឆ្វេងដៃ ក្បែរមាត់ផ្លូវនោះមិនខាន។ ខ្លោងទ្វានោះហើយ គឺជាខ្លោងទ្វាវត្តតុំ។

តាមពិត វត្តតុំមិនមែនជារមណីយដ្ឋានអីអស្ចារ្យនោះទេ តែមនុស្សរាល់គ្នាធ្លាប់តែឮវត្តតុំៗ តាមរយៈបទចម្រៀងដែលបានរៀបរាប់យ៉ាងខ្លីខាងលើនេះតែម្ដង។ បើប្រៀបធៀបនឹងវត្តអារាមនានានៅជនបទ វត្តតុំជាវត្តមួយដែលមានទីធ្លា និងការតុបតែងលើសគេបន្តិច ហើយសម្បូរមនុស្សមកកម្សាន្តច្រើនក្នុងពិធីបុណ្យប្រពៃណីធំៗ ម្ដងៗ ពិសេសបុណ្យកឋិន។

ខាងកើតវត្ត មានអាងស្តុកទឹកដ៏ធំ១គូ ដែលអ្នកនៅតំបន់នោះដាក់ឈ្មោះថា អូរតុំ។ អូរតុំ ជាបឹងផ្ទុកទឹករាប់ម៉ឺនម៉ែត្រគួប ហើយជាប្រភពដ៏ចាំបាច់បំផុតបម្រើដល់ការដាំដុះស្រូវ របស់ប្រជាកសិករនៅទីនោះបាន១ឆ្នាំបាន២ដង ប្រកបដោយភោគផលខ្ពស់។ អូរតុំ ក៏ជាកន្លែងមួយមានខ្យល់អាកាសត្រជាក់ស្រេង ដែលយុវវ័យជំទង់ៗចូលចិត្តនាំគ្នាទៅអង្គុយនិយាយគ្នាលេងយ៉ាង សប្បាយ នៅលើស្ពានមួយជាប់មាត់អូរតុំនោះ ហើយអ្នកស្រុកមួយចំនួននៅទីនោះក៏តែងតែងមកងូតទឹកដ៏ថ្លាឈ្វេង ក្នុងអូរតុំរាល់ល្ងាចផងដែរ។

នៅរដូវវស្សា ផ្ទៃទឹកអូរតុំទាំងមូលពេញប្រៀបដោយទឹកធំល្វឹងល្វើយ។ បើនិយាយរាល់បុណ្យកឋិននៅវត្តតុំរាល់ឆ្នាំ អូរតុំ បានដើរតួជាកន្លែងកម្សាន្តដ៏សប្បាយ ដល់អ្នកដែលទៅលេងវត្តនោះ។ នៅតាមរបងវត្តលើផ្ទៃទឹកតម្រៀបពេញប្រៀបដោយ អូប័រ សម្រាប់ឲ្យអ្នកទៅលេងទិញសំបុត្រជិះបញ្ឆិចចុះ បញ្ឆិចឡើងលើផ្ទៃទឹកដ៏ធំល្ហល្ហេវ ដើម្បីស្រូបយកខ្យល់អាកាសត្រជាក់បរិសុទ្ធ។

បើបានទៅលេង ឬទៅធ្វើការនៅទីរួមខេត្តតាកែវ កុំភ្លេចណា ហួសទៅលេងវត្តតុំម្ដងមើល នោះអ្នកនឹងបានយល់ថា ហេតុអ្វីបានជាកវីសុខចិត្តចំណាយទឹកប៊ិចរបស់ខ្លួន មកពិពណ៌នាវត្តនេះជាបទចម្រៀង ច្រៀងឲ្យប្រជាពលរដ្ឋខ្មែរទូទាំងប្រទេសបានស្ដាប់កម្សាន្ត។ ជាពិសេស អ្នកក៏នឹងបានជិះអូប័រកម្សាន្តលេងសប្បាយបះសក់នៅទីនោះផងដែរ ៕